林鄭新風下，唔只局長要見人，副局政助都要多多同傳媒聯絡，11名已經履新嘅政治助理同副局長噚日同傳媒茶敍，風頭躉當然係未上任已被要求下台嘅教育局副局長蔡若蓮，佢大部份時間都被傳媒包圍，助手至少4次拉開解圍，但唔夠幾秒蔡又再被圍。

稱早過葉建源入教協

蔡若蓮hardsell自己過去「好貼地」，履新後覺得自己要好努力學習，每日只能瞓約4粒鐘，比過去做校長6、7個鐘少，笑言「你睇我個樣都知啦，冇乜得好瞓！」透露願意接受挑戰入熱廚房係因為老公同兩個囝囝支持；至於教育局局長楊潤雄幾時搵佢做副局？蔡話唔記得，但吐出一句：「我都估佢（楊）唔到！」
佢席間自爆其實都係教協會員，1988年至今一直有交會費，多年前更曾在教協報發表文章，2000年後因為參加工聯會攝影班先加入教聯會，「我諗佢（教育界立法會議員葉建源）參加教聯早過我，我參加教協早過佢」。佢話上任後已嘗試約見葉建源，但葉不在港，佢打過電話畀教協會長馮偉華，引述馮話要等葉返港後再算。