政府研究多年嘅《種族歧視條例草案》終於出台，外界最關注嘅係向外國人講「鬼佬」、「阿差」、「賓賓」呢啲稱呼，對方感覺受辱，咁就可能犯法。噚日有聽眾打去商台節目《政經星期六》，質問呢條草案嘅大旗手林鄭月娥「反日本，打倒日本仔！」呢啲說話又算唔算犯法？呢位聽眾好激動咁話：「如果只係以個人感受作為觸犯種族歧視嘅準則，咁即係擾民！」
林鄭話，香港係一個法治社會，就算有人投訴被歧視，都要經法庭審理，佢話法官會以合理角度作判決，例如當時喺乜嘢環境講呢番話，林鄭叫啲市民唔使過份擔心喎。不過，八方聽完一輪，都唔知道即係有冇犯法喎？