秋官新電視劇《潮爆大狀》今晚登場，市場多咗好多八卦話題，港股今日升定跌，就格外受到關注。
睇番外圍形勢，杜指上周五跌41點，收11109。睇落跌幅唔算大，但技術上則進一步利淡，杜指20日線（11161）宣告失守，而10日線亦由升轉跌，均發出相當明確的短期調整訊號。杜指短期主要支持位在50日線11021，亦是去年10月至今的上升軌所在。換句話說，杜指若守穩11000水平，短期仍是反覆向上，否則將展開較大調整，或者要低見10650。
至於日股、上周四創17125的5年多新高後，上周五仍反覆上升14點，但今日跟隨美股借勢回吐的機會相當大，萬七關可能得而復失。綜合而言，今日外圍形勢利淡，秋官效應將可發揮，恒指料向下考驗20日線（15713）支持。
上星期六同大行老友入場睇超級新馬「喜皇寶」，可惜同系「喜德寶」跑第二，一口自製孖寶斷纜。大行老友叫留意吓世城一系，特別是最終控股公司世紀城市（355）。
近期麗新系重組，系內各股大幅炒上，相當矚目，趙飛雲雖然食唔正，但亦獲得些少甜頭。世城一系，以富豪酒店（078）表現最佳，百利保（617）次之，而世城最落後。未知是否麗新系的重組概念炒得有聲有色，近日亦傳出世城想透過重組來凸顯本身真正價值，仲話稍後將有動作跟尾。