【新增影片】

美國聯儲局終公佈下月縮表，港股今日CHOK到暈，個別股份繼續狂炒，以立投資管理董事總經理林少陽認為，市場已消化縮表消息，對港股仍維持看好：「唔估頂，估嚟冇意思。」

林少陽認為：「佢預先公佈咗一段好長時間，市場都好消化咗，對市場中性。我認為個市睇好嘅，個睇法冇變，冇必要變，市未必升得好急，今個月指數唔會點郁，個市場氣氛係好嘅。指數唔郁，但個別股都有不錯的升浪，市場資金係度，一路冇走過，仲有資金一路入緊嚟。」

他認為除非打仗，否則仍未見頂，不會大跌：「除非因為打仗，但跌都係短暫，因為北韓同美國實力好懸殊。而我又睇唔到佢打仗機會係咁高，金正恩坐咗係呢個位咁耐，佢唔係傻嘅，外界覺得佢傻啫。所以唔估頂，估嚟都冇乜意思。」

他認為可以留意個別板塊，例如科網，環保，內銀估值比較平，個別內房炒得太貴：「大局來看仍未過熱，除非成交額去到兩千至三千億，出現一兩次，先至要擔心。」

蘋果財經，關心你飯碗
http://fb.com/appledailyatm