【攞人命】美洲盃下年又踢 改制分兩組打足8場先攞到冠軍
蘋果日報 2019/12/04 23:10
巴西阿根廷哥倫比亞美洲盃南美足協
巴西剛贏得今年的美洲盃冠軍，但來年又要再出戰。
周三南美足協為2020年嘅美洲國家盃抽籤，咩話？美洲盃唔係今年先踢完，下年點解又踢？全因為南美足協希望同歐洲盃時間睇齊，下年再搞一屆，然後每4年踢一次。而嚟緊一屆嘅美洲盃賽制都會改革，由過去嘅12隊分3組，變成分2組。而打入決賽嘅球隊要打夠8場先有冠軍攞，比起世界盃贏冠軍嘅場數仲多，真係攞球員命。
下年嘅美洲盃將會由阿根廷同哥倫比亞合辦，而兩支主辦國將合別成為兩組嘅種籽球隊，A組阿根廷會同智利、烏拉圭、巴拉圭、玻利維亞，同埋受邀嘅澳洲一組；而B組哥倫比亞將會由哥倫比亞、衞冕冠軍巴西、秘魯、委內瑞拉、厄瓜多爾、同受邀嘅卡塔爾一組。
新一屆嘅美洲盃改成2組之後，6支球隊將會打單循環，即係每隊分組賽要打足5場。之後每組前4名晉級8強打淘汰賽。換句話說，打入最後四強嘅球隊，計埋決賽同季軍戰要打成8場波，仲辛苦過世界盃。而來年嘅美洲盃將會喺6月12日開波，打到7月12日，辛苦一班南美球員。
2020年美洲盃決賽周分組抽籤。
來年的賽事吉祥物Pibe。