【做咗媽媽緊張啲】許亦妮驚見行山客亂吐痰 感嘆自律很難：貪玩害人
蘋果日報 2020/03/23 18:05
行山許亦妮吐痰
港姐許芷熒（前名許亦妮，Whitney）上個月為商人老公誕下女兒「馮寶寶」，成為人母更多注重健康及環境衞生。
昨日Whitney與老公行山兼放狗，親親大自然原本好健康，不過兩公婆未有放下戒心，行山都戴好口罩。但防疫不是一、兩個人的事，她說親身經歷恐怖事件，見住有男行山客戴口罩上山，但行到中途除罩兼吐痰落地，非常不衞生。
到今日林鄭開記招，再公佈新防疫措施，其中一招是研究修例，禁止全港領有酒牌的酒吧與食肆停止賣酒，以圖減少人群聚集，林鄭在記招解釋：「飲醉少少會有更親密行為，令到交叉感染風險增加。」未知是否林鄭觸動到Whitney神經，她下午在IG又出post說：「自律原來對好多人來說是很難……原來唔見朋友對一啲朋友嚟講係好辛苦……原來唔飲酒對好多人嚟講係好辛苦……原來停止社交活動對好多嚟講真係好難……」又留tag「怕悶怕寂寞貪玩很害人」。Whitney亦有提及今日新增的確診患家包括3名外傭，她說昨日行山時見到有外傭野餐，不戴罩傾偈及玩，令Whitney喊喊豬表示：「僱主努力抗疫，佢哋care free出街玩。」
許亦妮昨日與老公行山，兩公婆都有戴口罩。（IG圖片）
親親大自然原本好健康…（IG圖片）
不過就有驚心一幕……見到人隨地吐痰。（IG圖片）
今日林鄭又慢幾拍宣佈新防疫措施，包括禁酒，似乎令許亦妮有感而發。