陸漢洋、雷頌德老婆梁家玉（Jade）、霍震寰噚晚喺紅磡出席「亞洲品牌頒獎晚宴」，陸漢洋女友苟芸慧遲啲會去意大利出席時裝騷，問佢會唔會同行？陸漢洋話：「我要去比利時參加歐洲賽車，今次係同法國車隊合作，大家分開唔同工作，唔同日子，佢早啲去意大利，賽完車之後，我會去join番佢。」

有傳陸漢洋同苟姑娘會順便喺意大利訂婚，但男方強調呢個只係謠言：「事實係咩就唔講喇，都想保留啲私隱，求婚之後會再公佈，我係有計劃，怕講咗出嚟冇surprise。」原來佢仲未知今年會唔會求婚先，最主要睇時間嘅配合，佢話：「今年檔期真係好難夾，佢年底開電影，大家個期都好滿，不過我係會精心計劃，慢工出細貨。」

苟姑娘喺新戲入面會有少少性感，唔知使唔使得到男友嘅批准呢？陸漢洋笑話：「又唔係我性感，我會尊重佢嘅職業，如果劇情需要，又係靚，睇尺度，又唔係情慾片，性感同露得多唔多肉係冇關係，我覺得露鎖骨已經好性感，我會尊重佢嘅工作。正如我揸車，佢都覺得好危險㗎，佢淨係叫我小心啲，呢方面係互相尊重。」陸漢洋仲話女友會同導演、編劇開會，識得衡量，之後都會同佢再傾，佢笑話：「我接受能力唔曳，我唔係幾鍾意佢着樽領囉！」

同場嘅「Mark嫂」阿Jade就呻近嚟好忙，都冇時間研製新菜式，佢話：「我之前喺YouTube分享過好多食譜同煮食心得，因為太忙都放低晒，又要車仔返學，如果我有工作，老公都會照顧個仔，但佢都有工作。」Jade仲話之前已有好多人問佢點解唔開餐廳，不過暫時真係處理唔到，或者等個仔大啲先，希望將來可以出本食譜，但會好嘥時間去整理資料，又要中英對照。