樂隊野佬即將在今個月22號喺九展Music Zone舉行「大約在冬至」演唱會，日前幾位成員包括主音小胡、 何兆基、Wilson 、Ming So同陳永康喺觀塘接受訪問，講到演唱會備戰情況。問到演唱會命名原因，何兆基解釋：「原因係我哋入紙book場嘅時候發現12月22號有期，仲要係星期五，心諗咁好彩，於是嗱嗱聲book咗先，後來先發現原來嗰日係冬至，怪唔得畀我哋book到。」

小胡表示既然開騷日是冬至，於是就索性將個演唱會叫「大約在冬至」：「係參考齊秦嘅《大約在冬季》嗰隻唱片，連演唱會poster都係抄足個造型，嗰日係夏天30幾度，我哋着住皮褸影喺尖東影相，熱到全身濕晒。」

野佬透露演唱會常演繹好多90年代嘅Cover歌：「主要集中喺90至94年，會有好多大家耳熟能詳嘅國語歌。」開騷撞正冬至，大家都返屋企食晚飯，對銷情會唔會好大壓力 ？佢哋話：「我哋將個開騷時間定喺晚上9點，希望大家食完飯後就嚟睇show。」有冇諗過晏晝開，咁觀眾睇完騷咪返屋企食飯？小胡笑言：「唔好啦，喺冬至開騷已經好搏命，仲要搞晏晝唔好再搏啦 。」

另外，佢哋透露啱啱亦推出新歌《嫌小姐》，小胡解釋：「首歌嘅意思係講緊啲女朋友平時對住男朋友嫌三嫌四，大家都有相似嘅同感。」佢哋舉例指：「例如帶佢出去食飯嫌啲嘢唔好食又嫌貴，一係出街嫌遠嫌多人，總知咩都嫌一餐，不過首歌最後有戴番頭盔話，其實個女仔都係想我哋好啫。」

更多娛聞，喺晒《娛果》
http://fb.com/appledailyent