中廣核電（1816）舊年少賺9%，EPS 19.1分，扣除非經常性損益後，純利升8%，計落PE 10倍，股息率3.7厘。2014年12月上市至今，收入由初期增兩成，去到舊年降至11%。由於核電上網電價同成本非常穩定，因此盈利增長可測性極高，當然喺冇大型核意外嘅情況下。

隨住備受爭議、倚賴法國核電技術而產生嘅台山1號歐洲壓水反應爐（EPR）核電機組投運，令中國成為全球第一個敢投運EPR機組嘅國家（中國真係冇嘢做唔出）。中廣核今年收入、盈利會繼續有增長。

中廣核營運中核電機組24,306兆瓦，在建機組容量7,434兆瓦，在建機組投運時間由今年至2022年，即係4年內至少帶嚟共三成增長。行業係零競爭，中國亦係發展核電最快嘅國家，亦冇打算學其他國家叫停。佢嘅淨利潤率高達26.9%，係因為門檻極高。

揸呢隻股，就求神拜佛中國冇大地震；有大地震，都求神拜佛希望機組冇事，呢個係最大風險。超大upside，就係全球正在研究第四代反應堆，務求將核廢料減低、安全度提高、效能提升，積極研究嘅係邊個？就係Bill Gates。可惜貿易戰令Bill Gates進華搞核電嘅如意算盤打不響。分析預期第四代反應堆難喺2030年之前投運，但呢個upside足以令核電真正盛行，所以不得不提。

晉佳

https://www.facebook.com/advanceguy1