再鋒利嘅刀都有生銹嘅一日，幾打得嘅人亦有病倒嘅一日。做咗差不多3個月特首嘅奶媽林鄭月娥，連月來不斷四圍飛外訪，返香港之後又一日走幾場公開活動，真係鐵打都會病！結果終於搞到大感冒，噚日仲要食住抗生素去活動，連林鄭自己都話今次係病得最犀利嘅一次，又話特首呢份工好難做，首要條件一定要身體好。

王志民即場斷症 叫畀掌聲

林鄭前日已經連踩幾場活動，到噚日朝早先去鄉議局出席國慶活動、晏晝去完國慶酒會，下午又再去行會成員湯家驊Ronny同港大專業進修學院合辦嘅政治及行政課程嘅開學禮，其實佢去國慶酒會時，把聲已經「萌萌哋」，佢仲自爆呢3日嚟都有病在身，同場嘅新中聯辦主任王志民即場幫佢「斷症」，話林鄭有感冒，叫大家畀掌聲林鄭。之後去到Ronny嗰度致辭時，林鄭自己都話，做特首要係身體好，呢次佢病得好犀利，食好多抗生素都唔掂。結果連去兩場活動後，林鄭都冇再答記者問題就走。
講開又講，噚日Ronny檔民主思路同港大專業進修學院搞嘅資深行政人員政治領袖文憑課程，下個月就開學。林鄭大讚課程之餘，仲話遲吓佢改組中策組，招聘廿至卅位青年人入去，讀完呢個課程肯定有優勢，當然亦唔表示讀完一定請啦。大家又知唔知有邊個讀呢個課程？原來民建聯嘅荃灣區議員林琳就報讀咗。

李八方