彭浩翔、鄒凱光及劉翁聯合演出，以貼地嘅題材講出兩性關係嘅棟篤笑《翔揸流灘》，將會喺明年1月19號移師到旺角麥花臣舉行Part 2，三人噚晚喺深水埗舉行記者會，今次場地去到旺角，鄒凱光話：「今次主題會講更多Local嘢， 例如我喺旺角嘅遺憾，即係識咗個學生妹原來要畀錢。」

劉翁就話希望可以喺台上對住觀眾講：「睥咩呀睥，至少完場前我都係安全嘅。」三人話到時大家會互相爆料，鄒凱光話：「互相爆大家食咗邊個明星，但記住『食』呢個字有好多解讀方法。」

同時彭浩翔話由於上次有太多圈中朋友嚟支持，加上場地細，所以好多觀眾都買唔到飛，於是先促成今次加場， 三人仲笑言以紅館為目標，希望終有一日到紅館繼續開。

精選娛聞，喺晒《娛果》
http://fb.com/appledailyent