出名毒舌嘅韓國主持人金九拉又再發功，今次毒舌嘅對象仲要係韓國人氣女團少女時代（少時）！喺噚日播出嘅綜藝《音談悖說》中，主持人以「歌壇戀愛business」為題，探討娛樂圈戀愛現象。

金九拉以少時為例，表示依家隊中多位成員爆出戀情，當中佢稱秀英同男友鄭京浩為「二把手們的結合」。金九拉表示：「秀英喺隊中第二個爆出戀情嘅，但相比第一個爆出戀情嘅允兒同其他成員，人氣就．．．．．．」

佢又話，鄭京浩距離爆紅仲差一步。因為秀英同鄭京浩呢對情侶人氣都未去到最高，所以金九拉稱佢哋為「二把手們的結合」，果然好毒舌！

對於金九拉嘅毒舌言論，同場嘉賓女星G.NA聽完之後都唔知講咩好，表示：「太無人情味啦！如果今日講嘅唔係少時而係同公司嘅4MINUTE，我都唔知應該俾咩反應，我已經唔能夠管理表情啦！」