港姐張嘉兒噚日喺溫哥華出嫁,同圈外男友NathanLau(Nate)結婚,下午先喺當地教堂行禮,張嘉兒由爸爸蹺住行入教堂,當爸爸同嘉兒行近新郎Nate忍唔住喜極而泣,在場做姊妹嘅戚黛黛透露,自己係第一次參加朋友婚禮喺教堂度進行,覺得好靚、好感動,佢又講:「今次嚟到溫哥華見到嘉兒同Nathan,真係可以搵到對方,見佢搵到一個好好嘅老公,作為朋友,真係好戥佢開心。」
教堂行禮之前有接新娘儀式,嘉兒着住傳統裙褂出嫁,去到教堂先換番婚紗。接新娘儀式,當然唔少得係玩新郎遊戲啦,黛黛話新郎哥要過三關,其中兩關重係玩核凸嘢。第一個係用朱古力醬喺保鮮紙寫咗「Natelove嘉兒」,要班兄弟同新郎用脷舔番乾淨保鮮紙,第二個遊戲係食蟲,班姊妹將啲唔同嘅蟲放喺6份早餐度,要班兄弟同新郎哥食晒佢,至於第三個遊戲係有口難言。黛黛話:「估嘉兒最中意嘅嘢,叫兄弟去做,Nathan去估,其實佢都好叻,有啲幾難,但佢都好快估到,所以接新娘過程都好順利。你問我開門利是,數目就唔講啦,我哋班姊妹都好開心好滿意啦。」
黛黛話成個婚禮好順利,自己從未試過出席一婚禮可以全部嘢有充裕時間,仲係underrun㖭,黛黛話:「好戥佢開心,成個婚禮好perfect,今次嚟到溫哥華見到嘉兒同Nathan搵到對方,搵到一個好好老公,作為朋友真係好開心。」