在亞視工作54年的老臣子程啟光（Philip），想當年19歲加入麗的電視，多年攀升成為高級節目執行主任，亞視前年更向他頒發「終身榮譽員工」獎狀，上月中傳出亞視要熄機，深愛亞視的Philip仍高呼：「亞洲電視萬歲，良心電視萬歲。」

亞視的免費牌照死期已到，今晚11時59分59秒就要熄機，看着亞視由盛到衰，再玩完，Philip過去一年已做足心理準備，他今年特意到廣播道亞視總台舊址緬懷。

昔日廣播道是五台山，亞視舊日總台由1968年建址到2007年，亞視總台就遷入大埔，當年39年歷史的亞視總台，現今變成了豪宅，人面全非。Philip站在對面馬路指指點點，他說：「豪宅門牌位置，當日係亞視舊日大閘，行入去有個長廊，仲有canteen，藝人等開工會坐喺canteen等出車，我當年office喺4樓，窗外望到山景。」

Philip難忘當年舊廠控制台半夜火災，他漏夜趕返總台視察情況，他今日指着豪宅停車場入口，正是當年火燭時火舌沿着大樓外牆向上燒位置，Philip只是站立了數分鐘，已勾起很多回憶，他說：「呢刻我百般滋味在心頭，好欷歔，我由港鐵站行路上嚟，諗番好多嘢，當年呢個地方係一個電視台製作中心，帶畀香港人好多歡樂同回憶。」

賣花當然要讚花香，Philip不諱言每日放工回家都開機睇亞視，他說：「我都有睇其他台，但當然都會睇亞視，除咗新聞，我最鍾意嘅節目係《尋找他鄉的故事》，呢個節目介紹世界各地華人異地生活，掙扎求存，好勵志。」至於最喜歡哪一位亞視藝人？Philip坦言：「亞視係有人情味大家庭，好難揀，個個都咁好，我同朱慧珊最好傾，佢平易近人。」

Philip經歷過亞視不同朝代，他直言對每位老闆都有感情，即使前投資者王征被外間鬧爆，但Philip還是護主情切：「每位投資者入場都抱好大希望，想振興亞視，無奈亞視近年經常換股東，王征都真金白銀投放咗23億入嚟，電視行業真係燒銀紙。」亞視今晚熄機，Philip雖說沒人要負上責任，但卻暗示：「呢個問題交畀巿民判斷。」政府去年不讓亞視續牌，莫非特首梁振英都有責任？Philip暗寸梁振英：「佢唔發牌畀亞視，真係好大勇氣決定呢件事，巿民應該心中有數。」

亞視令Philip最不捨的有三樣東西，他逐一細數：「首選同事間嘅人情味，其次係佢啲節目，聽日就睇唔到，好遺憾。第三樣我會揀亞視canteen，每朝返工，我總會上去幫襯買咖啡，中午又去食lunch，員工好親切。」

Philip又有甚麼建議令亞視起死回生，他說：「o依家真係唔知，好多嘢峰迴路轉，其實人人都救到亞視，只要有足夠財力同人才。」亞視明日起沒有免費牌照，但會意味着它可能會換形式求存，有望在網絡世界「復活」，Philip仍然堅信亞視不死，如有這一天，他還是願意拼命効忠：「將來係點，亞視肯聘用我，我餘生一定為佢服務，有能力一定繼續留喺度工作，喺亞視工作係我最大光榮，希望仲有呢個機會。」Philip承認明日起便受僱於德勤，將繼續留任亞視，處理後期工作，暫時未正式離職，心情未感到失落。

亞視陪着Philip度過黃金54年，所以今晚他會在大埔總台留守到熄機一刻，見證這個歷史時刻。Philip強調今晚不會哭別亞視，他希望笑着歡送。Philip自爆去年獲悉亞視不獲續牌時已過男兒淚，現在則抱平常心，假如今晚身邊同事太傷感，說不定也會受感染灑下傷感之淚，但現在仍冷靜控制情緒。即使明早起床，扭開電視看不到亞視，Philip謂也會支持接捧的港台和下周開台的ViuTV。

請Philip給亞視講出最後心底話，他仍然口頭蟬掛嘴邊：「亞視永恒，我愛亞視，亞視永遠在我心中。」