跳水係運動項目之一；插水，喺南美球壇被視為演技嘅表現，但來到歐洲球壇卻會被萬人唾罵！曼聯的基斯坦奴朗拿度（C7或C朗）上周六就冒住被萬人唾罵之險，完場前未掂到先跌低嘅演出，助曼聯大勝打比郡4:1，盡救「主勝」客，兼贏得新綽號「D7」，即「Diving7」（插水7號）！

「為求入波，不擇手段」

當史堤芬侯活為打比郡射入作客第1球後，3:1嘅比數簡直係賭友噩夢；紅魔今仗盤口開到[-2]，餘下14分鐘嘅比賽，必須𡁻多粒先可以皆大歡喜。補時階段，C7喺禁區內博得12碼，將比數改寫成4:1，對「主勝」捧場客嚟講簡直係拯救萬民，惟其懷疑插水行為，就觸發網民大戰。
C7未被對方掂到先跌低嘅情況，有網民以「插神」形容之；原因係佢「插花」同「插水」都首屈一指，無「人」能及。部份網民仲話佢「為求入波，不擇手段」，甚至有極端球迷大玩移花接木，將某男子跳水運動員嘅頭部接上C7容貌，戲謔其新朵「Diving7」！同時，自稱係理性曼聯迷嘅angoracat說：「佢都改咗好多，大家應該欣賞佢球技。」
當香港人討論D7應否收歛插水行徑之際，領隊費格遜則暗批愛將另一劣行：「假如泰維斯上演帽子戲法，對佢係一大鼓勵！」D7搶住射12碼雖略欠師兄風度，但[-2]嘅「主勝」的確滿足了大部份捧場客，話佢係天使魔鬼混合體亦不為過。同時，唔係焦點嘅老將傑斯，呢場就完成聯賽第100球里程碑。
此外，D7日前遭傳媒踢爆，前一場聯賽擊敗富咸後，可能因為趕住𠝹女，導致私人坐駕AudiR8怒炒迴旋處，搞到紅人變「黑人」，面燶燶冇晒癮！