網上公審唔代表自己一定啱晒,有時反而會引火自焚。有個男人前日喺新填地街邊違例泊車,俾警員抄牌之後好唔順氣,仲用手機拍攝警員放上網公審,結果反而招嚟大批網民指摘佢「做錯晒」,仲反轉過嚟俾人起底公開身份。
根據嗰個男人上載上網嘅短片所見,警員當時拎住本簿抄牌,一邊質問拍片男人:「咁鍾意周圍泊新填地街,違法位當合法呀,係咪問過你先可以抄牌?你自己擺違法位,仲聲大夾惡?」片段作結前,警方再補多一句:「你影好啲呀,記得擺上網,唔擺正契弟!」上載者未有詳細交代事情始末,但有另一個網民隨即將事發現場照片放上fb,清楚可見司機將一架奧迪房車泊喺新填地街455號對開上落客區,仲向警員舉機拍攝。根據交通道路條例,只有在上落貨時先至可以泊車喺上落客區較長時間,估計司機將該區當作泊車位,而俾警員票控。