暫委裁判官陳碧橋,昨日宣判,裁定於「光復元朗」反水貨客示威中,聲稱被警察非禮的女被告吳麗英,以胸襲警罪成,判囚3個月15日。吳麗英當時遭男警從後推跌至鼻骨骨折,滿面披血,陳碧橋形容吳襲警程度雖輕,但她同時高呼警察非禮,令在場人士隨即跟着叫非禮,又紛紛向總督察陳嘉寶投擲雜物,令案件變得嚴重。陳官上次裁決時更曾稱,吳麗英誣衊總督察非禮,行為惡毒。
葉蘊儀一直有關注這案件進展及判決,昨日更於fb發起一人一相行動,hashtag是「反對女性胸部被視為攻擊性武器」,不少網民響應,但未知是否因為此行動,引來一些網民惡意留言攻擊。這些網民,簡稱「五毛」。
葉蘊儀寫道:「一個人的身分有好多,我曾是演員,現是從事藝術創作。唔好唔知我背景就在留言,請尊重本人,這是認真的事,唔好作人身攻擊。要反對唔該請去你自己個page到講,我個page係識分析事實的人留言,唔認同就去認同你的人去支持佢。唔該。再在我page留言攻擊我的五毛,我會馬上delete你及舉報你。」逾千網民給like力撐。
五毛未有令葉蘊儀噤聲。今早她接受商業《在晴朗的一天出發》電話訪問時直言,「以胸襲警」這罪名侮辱了女性身體,更擔心此案會讓以後女示威者被非禮時不敢發聲:「我之前都有留意呢單案,覺得如果成單case嚟講,你可以話佢影響到其他嘅人,即係你話佢嗌非禮,吸引其他人注意咁,但大家唔係當事人,你點知當時唔係真係有人掂到佢個胸而有咁嘅反應?你可以控告佢其他罪名,但你唔可以控告佢用胸部襲警。咁樣你係侮辱咗女性嘅身體。」
葉蘊儀又擔心,今次法庭裁決會開了先例,令女性即使被非禮,亦不敢出聲:「嗰個裁判官(陳碧橋)仲講明,話一定要好重判嘅威嚇,令示威者唔會咁做。佢擺明就係因為示威嘅問題,驚啲女仔之後會咁樣,你唔應該就示威呢樣嘢,驚好多女仔出嚟示威嘅時候就攞個胸部出嚟講,我覺得就唔係幾啱邏輯。」
葉蘊儀又提到包致金姪女襲警一案:「同埋我見到2011年,有個女人,俾人影晒片段,真係摑咗個警察一巴,但只係罰錢,但點解,就算佢真係有用個胸部去襲警,點解佢依家係入獄三個月?」