六嬸一聲令下，無綫晚間新聞大革新，呢個禮拜一起提前到晚上11點播出，改革不足一星期已經報捷，TVB內部消息透露，晚間新聞收視由原本約10點，跳升至逾20點，達到六嬸要求，難怪新聞部話事人袁志偉笑不停口。至於變陣迎戰嘅ATV夜間新聞，據知收視略跌，收視率仍然維持單位數。

有TVB新聞部中人則稱，晚間新聞改變報道模式，好壞見仁見智，收視率升亦可能同慣性收視有關，八方思疑收視大躍進，同無綫提前播新聞無關，因為觀眾發現新聞越夜先至越好睇。何解呢？因為呢幾日網民都熱烈討論晚間新聞結束後個天氣報告，好多人大讚天氣女郎笑容甜美，報道天氣時身體語言豐富，跳跳紮青春氣息令人眼前一亮，隨時冧到天氣先生都暈晒大浪。
呢個新面孔天氣女郎叫黃婉曼，中大畢業，去年攞過人權新聞獎，係時事節目《星期二檔案》記者，據講由於佢年輕有活力，所以獲高層欽點兼任天氣女郎。黃婉曼別具一格嘅報道天氣方式，知情人士話正式出街前經多番試鏡，覺得效果幾得意所以一試，事實上出街後獲得唔少好評，好多網民都話kawaii，講完香港天氣，報道環球天氣前跳一跳講嗰句「跟住我哋跳出香港」，更加令人驚喜，可惜新聞部有人睇完後O咗嘴，所以之後兩晚即刻收斂，冇咁跳脫。

晚間新聞越夜越精采，「魔童」王維基噚日去《志雲飯局》時，亦大讚TVB改革新聞娛樂化「好正」，內容深入得嚟又夠平民化，而且主播樣靚化妝靚，「好似一個藝員咁」，佢又點名指記者方東昇表現略為生硬，建議佢進修演技。魔童又話，TVB搞改革好多橋其實係抄襲佢意念，應該畀顧問費佢，魔童咁講即係讚番自己啫。佢身為ATV顧問，對亞視新聞又有乜意見呢？講到自己台，佢即刻封嘴，免得講多錯多又得罪人。
王維基透露上年底離開亞視後，經常跑步同彈琴，並準備讀神學，「𠵱家人生上半場完咗，中場休息15分鐘，人每日都會成長，經一事長一智。」
mailto:[email protected]