由大馬主王明澤統領之「綵」系馬開季大旺，呢日又有馬贏，旗下澳洲自購馬告東尼馬房之「有醒」上個月17號夜馬泥地跑近完，今鋪跑番草地即刻搞掂，12檔出閘沿途蝕位搶放，返到嚟仲有餘力掟甩亞、季軍「大勝利」及「金鹿」勝出，三班睇嚟留唔住，而鞍上人蔡明紹苦戰至第六個賽日亦告開齋！
屈指一算，自王明澤囝囝王經緯太太有孕後，王家由9月24日開始至10月1日共8日間，有「勁綵」(兩捷)、「有綵」同「有醒」合共四WIN，馬主起勢拉頭馬收獎金。今場方廐初出馬「大勝利」閘前落重飛着啡燈跌到6.2倍，落飛黨未竟全功，但搭「有醒」呢條33倍啡燈Q卻中到應，除本照樣有錢贏。
王明澤賽後與告東尼握手時high到跳舞，他說：「上季我們養馬都幾多，全季只贏了五場，希望今季一家人可以拉到十場頭馬，就心滿意足。至於『有醒』今場贏馬姿態甚好，應仍有分在手，此馬草地及泥地均可以勝任，相信牠會繼續進步。」