韓國「2018 Asia Artist Awards」（AAA）於大前日舉行，一眾得獎男團女團及藝人都有現身支持，當中包括TWICE、防彈少年團(BTS)、Wanna One、允兒、IU、秀智、李秉憲等都有撐場，而台灣藝人劉以豪都有到場領取Best Choice獎。

劉以豪因為台灣電影《帶我去月球》而令佢喺韓國人氣急升，仲喺現場同允兒合照，又獲安排坐第一行，夾喺允兒同宣美之間，劉以豪話允兒好體貼，事關佢本身韓文唔係咁好，但允兒就用中文陪佢傾偈，劉以豪之後仲同允兒一齊接受訪問，佢話：「我從來沒有想過這件事會成真，上次她來台灣說想跟我見面，我只抱持調皮心態想說有點期待合作，沒想到真的在AAA見面。」劉以豪大讚允兒完全係女神一樣，見到對方時自己個腦袋好似停咗一樣，唔知道應該講乜嘢好。

而喺現場佢亦見到同鄉、TWICE嘅台灣成員周子瑜，佢話同對方有打招呼，但大家冇乜點傾到偈，同時亦錯過咗同子瑜合照嘅機會。反而喺現場睇到BTS嘅演出就令佢大開眼界，更笑言：「真的很厲害，全場都在為他們尖叫。還有那個大砲（相機）！全場都是大砲！」

精選韓流，喺晒《娛果》
http://fb.com/appledailyent