特區政府噚日公開嘅民情報告，詳細記錄親政府團體佔中期間嘅活動。結果藍絲陣營搞咗咁多大龍鳳後，正義聯盟召集人李偲嫣及保普選反佔中大聯盟發起人周融成功跑出，八方發現佢哋喺報告各被點名四次，喺藍絲陣營，意見算受政府重視，至少反映佢哋喺反佔領運動有落場打過波，幫阿爺製造民意呢方面，認真冇甩拖。
唔少網民好關注嘅李偲嫣，八方發現佢唔只識得突然「瘦身」，仲識「分身」，先後用「香港家長聯會會長」、「藍絲帶運動」、「正義聯盟」、「撐警大聯盟」等名目成功入到報告，政府亦將偲嫣BB遭遇詳細記錄，唔似得記錄催淚彈發射數目時咁求其，包括記低偲嫣BB 10月到金鐘要求佔領學生道歉同自首時，「在場示威人士向她高唱生日歌」。

熱血公民遭遺忘

至於周融亦好犀利，同偲嫣BB同時以四被點名齊名，佢9月底呼籲旺角佔領者改到金鐘繼續佔領等「溫和」言論，亦被包攬其中，而佢個保普選反佔中大聯盟嘅活動，則好多次被提及，認真巴閉！同樣愛博上鏡嘅「收工男」傅振中，個名雖然只出現咗一次，但佢嘅「保衛香港運動」唔少活動都榜上有名。而普通話同澳門特首崔世安有得揮嘅「愛港之聲」召集人高達斌，就比「收工男」稍遜，個名出得一次之餘，報告亦只羅列「愛港之聲」搞嘅四次活動。
有啲口痕友就好心水清，發現經常聲稱要勇武抗爭嘅熱血公民，同佢哋嗰位去示威區自稱記者嘅黃洋達都冇被點名，唔知會唔會好葡萄呢？

李八方

mailto:[email protected]