【隔牆對論】
新界東北新發展區計劃巧施政治化妝後「終極回歸」，相對上一次諮詢被指是「滅十村、毀萬家、興豪宅」式的發展計劃，新方案則加大公營房屋比例至六成，又聲稱影響1,000戶居民，可換來17萬人的居所。
粉嶺北農村及居民聯席成員卓佳佳認為，提高公屋比例是回應民意，但不代表是最佳方案。政府口中的「加強版」公私營合作模式，更是「只向權貴屈服，但絕不向民間妥協」。上水鄉事委員會主席侯志強則批評，堅持不遷不拆的非原居民「自私」、「因姦不遂，惱羞成怒，百分之百係（想搞）逆權侵佔」。
記者︰姚國雄　梁德倫

等賣地　侯志強︰霸住塊地好自私

記：《蘋果》記者
侯：上水鄉事委員會主席侯志強
黃：農民黃七娣

新界東北「終極方案」，政府斥資1,200億元公帑收地，當中收地賠償約佔300億元，除了早已囤積大量農地的大地產商，發展區內的原居民預計也會取得優厚的收地賠償。侯志強過去曾說過：「你賠夠錢畀我，祠堂都可以畀埋你。」

記：你為甚麼會支持方案？
侯：東北發展唔單止對本區有利，我覺得係香港整體發展，如果香港唔發展，停滯不前，香港點樣進步？後生仔因樓價貴，買唔到樓，如果你冇地，巧婦難為無米炊，樓從何而來呢？唔通從天而降？唔可能㗎嘛！

記：以你所接觸的農民，他們究竟想不想被收地？
侯：喺東北古洞，我相信九成幾農民係渴望政府收地。佢哋個個六、七十歲，仲點耕田？耕田係好辛苦嘅，唔係得把口講。大家成日話鍾意田園生活，其實係鍾意玩，希望細路仔嚟耕吓田。呢啲係玩票性質，同耕田嚟搵食係兩回事，搵食講價錢、講收成。耕田係日灑雨淋嘅工作，佢哋係老弱傷殘，有啲農民要請內地嘅農民嚟幫手。
黃：各區農友都好渴求政府收地，因為耕咗幾十年好疲倦。東北發展都係農民渴求嘅事，希望政府收番。佢哋年紀大，做到腰梗晒，冇一個農友係完整冇事，政府一收地，佢哋就退休。我哋呢班想復耕嘅，真係想有一大塊地做有機耕種，做好整塊農地嘅設施，統一規劃，當然希望政府有補貼，我唔介意搬㗎。

對於發展、保育，原居民與非原居民有一道鴻溝，在上一次的發展方案爭議中，侯曾揶揄不願離開的村民為數很少，「我用機關槍去掃都死唔到十幾人！」

記：對於有人堅持不遷不拆有何看法？
侯：佢哋成日都講好鍾意、好嚮往田園生活，呢班人十之八九，不務正業，搞亂秩序，佢哋有幾多個真係住喺農地呢？唔係居民、唔係業主，佢哋有乜嘢權發聲呢？

記：你曾說反對東北發展者是「天外飛星」，但確有居民真的連賠償也不想要，只想維持原狀，他們的訴求不應被照顧嗎？
侯：做人唔好咁自私，今時今日，好多居民住喺劏房、籠屋，當你置身其中，你都想政府嗱嗱聲起多啲公屋、起多啲大廈，畀人租、畀人賣。個個都霸住個地方，做人要睇個大社會、大世界，唔好咁自私，成日霸住塊地，你知唔知咁做法係非常之自私㗎！
呢班人嘅老竇、阿爺當年走難落嚟，如果唔係當年原居民租地畀佢哋耕田，我夠膽講，佢哋仔女冇𠵱家咁牙擦，餓死咗啦。但呢班人嘅仔女搞逆權侵佔，霸咗人哋嘅地變咗做自己，呢啲係不肖子。我奉勸呢啲不肖子，做人要感恩，你阿爺嚟嗰日，受咗人哋恩惠，遲早要搬，唔能夠賴死唔走。

記：你的意思是，如今反對的居民，全都是逆權侵佔？
侯：係！佢哋係八個字：「因姦不遂，惱羞成怒」，發爛渣囉，百分之百係逆權侵佔，我哋村民開咗無數次會，有個喺馬屎埔嘅，佢話佢耕田，我同佢講佢有一半田係冇耕，佢話因為政府整渠，冇水源，但其實佢將塊地嚟泊車、泊貨櫃。如果你真係耕田，我趕你走，我唔人道，但如果你用嚟泊貨櫃、泊車，就應該快啲趕佢走啦。
黃：我都好了解一個人究竟真係種菜定係唔係，我問過住喺馬寶寶農場隔籬嘅人，佢哋都話佢哋唔係種菜，一班人玩吓玩吓，我有次喺電台見過對方，我問佢哋嘅收成攞去邊度賣？佢答唔到我。

東北爭議的最新焦點，落在政府應否收回佔地約170公頃的粉嶺高爾夫球場，有指這170公頃土地，剛好可容納17萬人居住，能滿足發展計劃的需求。

記：有聲音提出東北新發展區，不如拿粉嶺的高球場取代，建議是否可行？
侯：我認為政府用1,000蚊地價批畀球會，對香港整體社會係非常之唔公道，但究竟點做要留畀政府去諗。但如果高球場用嚟發展，又要重新規劃，時間漫長，你𠵱家發展係燃眉之急，又有法律程序，又要搵地方畀高球場搬。高球場一片綠油油，過唔過到環保人士嗰一關呢？環評、雀鳥棲息嘅問題呢？你挖爛咗佢，變做石屎森林，大家係咪想破壞生態呢？如果你去嘈高球場，我會去埋一份㗎，我會幫手一齊嘈。我唔係呢個球會會員，我可以行入去打波，唔使畀錢，仲巴閉過啲會員，但我一年都唔去一次，我打波有司機車我上去大陸打，使乜嘢睇人面色！

記：你認為政府放棄傳統收地模式，改為與地產商公私營發展新界東北，是否官商勾結？你贊成哪種發展模式？
侯：總之政府用最快速度收土地起到樓就叫上策，無論公營、私營、點發展我都贊成，我唔係偏幫一方，不過，呢個世界係冇公平，公平仲邊個肯上進呀！個個都等派餅仔，世界係適者生存，永不公平。你有眼光嘅，你咪買幾塊地囉，始終有一日你都會發達，唔可以人哋賺錢你唔抵得人哋，妒忌人哋。

mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange