唐英年食住風尾 - 李八方

蘋果日報 2003/09/03 00:00


新任財政司司長唐英年可謂貴人出路招風雨,因為佢定咗今日開始見各界人士,第一批見嘅係民主黨,認真畀足面,只要風球一落,會面會如期喺早上十一點半舉行。
杜鵑亦打亂咗白鴿黨嘅計劃,佢哋原定噚晚黨團開會傾吓同唐司長講乜,結果梗係開唔成,只好改至今朝九點開,你話幾辛苦。
咁唐司長嘅節目真係安排得好密,星期四見港進聯,星期五見前綫同早餐派,星期日就分分鐘又飛咗去福建,今次就專程去廈門出席一個關於吸引外資嘅全國性活動,聽講啲領導都會出席,而老董亦諗緊去唔去,個活動七至九號舉行。
唐英年咁忙,唔怪得抽唔到時間搬屋,八方聽聞佢早前同太太去新官邸睇過,覺得要做啲改動,因為佢有三女一子,人數比阿松多,所以點都要裝修吓先至可以搬去住。


傳真︰2623-9278
電郵︰[email protected]