【本報訊】冰島陸地面積約10萬平方公里，是香港的100倍，但人口僅33萬，不及一個油尖旺。這並不代表冰島很荒涼，因單是今年，估計就有230萬旅客到訪。2008年瀕臨破產的島國，有賴旅遊業振興經濟，但人滿之患也帶來另一危機。
「睇你企喺乜角度睇啦，如果係經濟角度，係好事，冰島搵錢多，經濟好，有邊個會唔開心？但係如果由冰島本身嚟睇，確實因為遊客多所以為大家生活帶來唔少改變」，阿丹說。

遊人太多　溫泉藍變綠

以必到景點藍湖溫泉（Blue Lagoon）為例，「我啱啱嚟嘅時候，Blue Lagoon係藍色嘅，但係𠵱家已經係綠色。因為多咗人，海藻嗰啲水中微生物多咗，好難即刻去清理。official話mineral多咗對你好，但係其實係人都睇得出係太多人，藍色自然變綠色。我哋𠵱家係默默地叫Green Lagoon囉」。
冰島有很多私有土地，冰島法例規定，所有冰島人都可以任意進出任何私人土地，但外來的旅客除外。旅客卻偏要硬闖，「有個叫Tiffany Blue嘅瀑布，其實係一個私人地方，已經講咗好多次，之前個地主已經嬲㗎喇，將佢block咗，但係都係有啲遊客要跨過去」。
又例如南部一個石灘，因遺留着一架美軍軍機殘骸，又有歌手Justin Bieber前往取景拍MV，招來大量遊客前往，結果被地主封路，嚴禁車輛駛入，旅客只能徒步一、兩小時進入。
冰島全國都有不少被人叠起的小石塔，「其實有啲係冰島人用嚟做記號嘅，因為一落雪好多路會封晒你睇唔到，雪同路中間完全冇一個分界，佢哋好多人都係靠堆起嘅石頭嚟分辨呢條路向邊度，但係有啲遊客唔知，覺得好玩，就自己堆好多，搞到同原本嗰啲冇分別，會令人覺得好困擾」。
■記者蔡元貴