由神劇《太陽的後裔》金牌編劇金恩淑執筆、韓國男星李秉憲、金泰璃、柳演錫、卞耀漢等人主演嘅tvN新劇《陽光先生》(Mr. Sunshine)，將於下周六首播，劇組今日下午於首爾舉行製作發佈會，不過今日突然被傳離婚嘅金恩淑就未有出席，而李秉憲、金泰璃、柳演錫等人均有現身。

金泰璃似乎為咗配合劇中千金小姐嘅形象，現年28歲嘅佢今日穿上白色印花連身裙現身，充滿復古嘅味道，同時都令佢顯得有啲成熟。

而金泰璃跟47歲嘅李秉憲唔知係唔係因為相差19年，二人於台上似乎表現尷尬，除咗企得好開外，合照時又冇咩表情，反而金泰璃跟金敏貞就表現親暱，於台上又手拖手，又齊齊派心心，而且有講有笑，似乎非常好感情。

發佈會上，李秉憲對金泰璃讚不絕口，指對方演技出色，又表示雖然二人年齡差距大，不過拍劇時完全冇意識到年齡差距嘅問題。問到金泰璃跟咁多前輩合作會唔會感到壓力，佢坦言驚自己跟唔上大家嘅演技，不過跟李秉憲前輩相處時好舒服。

另外，今次係李秉憲事隔9年再拍韓劇，有業內人士估計李秉憲是次拍劇薪酬高達140萬港元一集，合共24集嘅《陽光先生》，估計李秉憲穩袋3,360萬港元。

更多韓流，喺晒《娛果》
http://fb.com/appledailyent