練馬師係馬會發牌人士，不過某程度都算係自己生意，而且呢門生意絕對係得天獨厚，唔單止收入高，馬房係馬會提供唔使交租，伙記又係馬會負責出糧，只要每季成績達標就可做到退休，唔怕業主加租迫遷，試問咁好嘅生意去邊度搵？

亦因此唔少練馬師都想子承父業，姚本輝、葉楚航及羅富全嘅公子依家已經在馬房工作，同樣是承繼父業的方嘉柏亦積極培訓下一代。

至於Danny沈集成囝囝雖然依家只得七歲，但原來對馬匹都有非常濃厚嘅興趣。好多小朋友見到馬匹這類龐然大物都會驚驚，不過沈集成囝囝自幼出入馬房，一早當馬匹係寵物般看待，沈集成透露最近更為囝囝安排到入雙魚河學習騎馬。

沈集成一向工作認真，有時會不苟言笑，不過一講到囝囝學騎馬，就由心中笑出來。七歲人仔講到要繼承父業言之尚早，不過能夠兩仔爺有共同興趣，亦難怪沈集成笑得咁甜矣。