楊千嬅之前喺C AllStar演唱會鬆口，話下年可能退休，跟手又有消息指佢上大陸參加《歌手》，係咪退休講唔定，但今晚仍然可以聽佢唱歌，因為今晚佢喺紅館開演唱會。

「楊千嬅三二一GO!演唱會」開售時被指公開發售數量太少，喺加場再加場之下，千嬅non-stop咁放棄咗中間兩日休息時間直踩，成為迎聖誕兼跨年演唱會，頭場今晚喺紅館開始，fans可以同千嬅瘋狂慶祝。

頭場出席嘅朋友就包括林夕、千嬅爸爸媽媽、老公丁子高同囝囝Torres、Eric Kwok、小儀、温碧霞一家三口、蔡一傑，其中千嬅媽媽帶病支持女兒。

2040：演唱會開始，千嬅一改形象，以一身銀色長裙，配上一個銀色短髮示人，第一首歌唱出《繼續努力》。

2049：千嬅一出嚟就閃令令，雖然頭髮染咗銀色，但喺髮尾依然見到啲啲紫色，不失傳統。佢又同全場20位dancers跳舞，去到第二首《熱血青年》全場氣氛熱烈。

2052：千第唱完第三首歌《放煙花》之前，佢歡迎觀眾到場，話會一齊倒數，之後喺舞台放煙花。

2056：播出林海峰扮DJ嘅片，佢話：「倒數係因為，時間係向前走，人生出世嗰刻就開始倒數。不過有個姓楊嘅人，心口有個勇字，無論遇到咩事，佢都係一二三GO!」然後千嬅就唱《數你》，當時千嬅係升上半空，離台最少15米，頭頂有個天使圈，畫面好靚。

2109：千嬅由半直降番落嚟，唱到《可惜我是水瓶座》全場合唱。

2120：千嬅唱到第9首歌之前，喺舞台左右兩邊落咗金色嘅布幕，中間就係黑色，千嬅喺黑幕後面出場，配合歌曲《的士司機》，有幾架的士投射咗喺布幕上面。千嬅喺呢個環節換咗件上半身係貼身嘅黑色閃片，下身係金黃色長裙，腰間有個人馬座圖案，睇得到佢操到好fit。

2128：唱到《小城大事》，觀眾以打氣捧一齊打拍子，唱到副歌又再一齊大合唱。

2133：經過一輪熱舞又跳又唱之後，千嬅企定唱《翅膀下的風》，男dancer就於旋轉舞台上圍住千嬅做肢體舞蹈。

2140：間場時舞台播出一段怪獸侵襲地球嘅片，千嬅出場時以激光槍打怪獸，囝囝Torres喺台下見到媽咪打贏怪獸好開心。

2143：千嬅唱到《Wonder Woman》換咗件女殺手Deep V衫，勁歌熱，踢腿、側手翻咩都有。

2150：舞台頂台降组舞台燈配合《新世紀福音戰士》，千嬅就喺升降台唱歌，大螢幕就播出火炎畫面，期間升降台又升起又斜 ，唱完《烈女》再加兩下爆破聲響。

2212：唱完《洋蔥》後千嬅再次落台換衫，今次播放一條關於人生嘅短片，片段見到一個女仔由拍拖、結婚、生仔餵人奶，慢慢去到小朋友開始長大讀書、有自己生活圈子，父母慢慢老去，最尾出現：「life is not a journey , life is music，人生就如音樂，舞蹈，表演的過程才是重點。」短片播放完畢之後千嬅以一身修身藍色魚尾裙出場。

2228：唱完第21首歌《親》，千嬅話呢次係第一次公開唱，呢首歌係37周入錄音室唱，林夕為佢填詞，今日唱出嚟送俾爸爸媽媽。又一度哽咽同fans講要孝順父母、好好對待下一代。

2234：進入encore，黑色晚裝Deep V露腿，襯一條金色心型頸鏈，唱出《缺陷美》，佢話首歌係廿幾年前，佢話人有缺陷先完美。

2254：千嬅話Torres喺屋企問佢做乜換咗戰衣，係好大力量。之後唱到《閃靈》終於行去台邊，fans上前同佢合照，不過明明係黑色昍裝，但右邊仍然跌咗黑色bra帶出嚟。

2306：千嬅話要唱最後一首歌，觀眾答佢現時仲係9點，千嬅先係堅持係最後一首歌，再改變主意商量加歌唱，之後再唱出《少女的祈禱》。

2316：全場完

歌list：
1.《繼續努力》作詞：黃偉文
2.《熱血青年》作詞：林夕
3.《放煙花》 作詞：林夕
4.《數你》作詞：林夕
5.《最後的歌》作詞：林夕
6.《自由行》作詞：黃偉文
7.《可惜我是水瓶座》作詞：黃偉文
8.《All about Love》作詞：林若寧
9.《的士司機》作詞：林夕
10.《手信》作詞：林夕
11.《小城大事》作詞：林夕
12.《翅膀下的風》作詞：藍奕邦
13.《電光幻影》作詞：林夕
14.《Wonder Woman》作詞：6號@RubberBand
15.《新世紀福音戰士》作詞：黃偉文
16.《烈女》作詞：林夕
17.《洋蔥》作詞：黃偉文
18.《火鳥》作詞：林夕
19.《我的生存之道》作詞：林夕
20.《飛女正傳》作詞：林夕
21.《親》作詞：林夕
22.《我係我》作詞：林夕
Encore：
23.《缺陷美》作詞：馮正
24.《煉金術》作詞：黃偉文
25.《閃靈》作詞：林夕
26.《野孩子》作詞：黃偉文
27.《假如讓我說下去》作詞：林夕
28.《少女的祈禱》作詞：林夕
29.《一二三 三二一》作詞：林夕