英倫門神有喜有悲
求驗客手記:獲加被撩㷫郁球迷

蘋果日報 2004/02/02 00:00


上周六晚英超聯賽事,幾位英格蘭國腳級門將都有令人「意外」表現;首先係愛華頓門將馬田,對利物浦打到好似識飛咁,對手攻極都入唔到,激死唔少上盤客。
馬田威風,佢舊袍澤羅賓遜就喺列斯對米杜士堡一役領紅牌。其實我求大俠睇到,當時就嚟完場,列斯又輸緊○比二,佢根本無必要踢低對手;之前有球會想簽佢又唔騷人,𠵱家搞到要停賽,早知走人好過啦!
最後到李斯特城個獲加,對維拉失五球,重俾球迷走入場挑釁,結果佢對嗰位球迷有所動作,或被起訴㖭!計我話,隊波輸到咁大鑊,嗰條友重要撩事鬥非,過份啲啩!

艾列頓去到盡幫不來梅留美好回憶
好多球員喺長假後表現跌watt,但艾列頓例外。前晚佢入兩粒幫不來梅贏哈化四比○,今屆德甲入球去到十八球,季尾隨時破三十大關。翻查歷史,佢喺德國五年都未攞過神射手,家陣有胡叫,梗搏命啦!況且佢下屆都過史浩克,所謂好嚟好去,佢都想幫不來梅攞聯賽冠軍。

舒寧咸廿四孝老竇鋪條青雲路畀個仔行
英甲球隊米禾爾啱啱簽入舒寧咸?無錯,不過呢個係查理舒寧咸,係正牌踢緊樸茨茅夫,嗰位前英格蘭國腳舒寧咸個仔嚟嘅。據知查理之前係熱刺青年軍,呢次轉會都係舒寧咸有份安排,因為舒寧咸當年就係喺米禾爾出身,睇嚟都係想鋪返自己條青雲路畀個仔行咁喎!
比歷連奴倒地嚇親人以為又有球員……
前晚西甲聯華倫西亞大勝馬拉加,焦點除咗華倫大勝六比一,重有佢哋後衞比歷連奴。事關比賽途中呢位阿根廷球員突然倒地,場內外嘅職球員即刻好緊張,以為又係暴斃事件……好彩最後比歷連奴都無事;華倫方面話比歷連奴不過係血糖低啫,咁都冇咁驚。

力帆降班兼冇糧出謝暉返國發展真運滯
前國足成員謝暉曾經喺德國球壇發展,最後不甚如意,上年返中國球壇希望有新開始,點知重慶力帆最終要降班,謝暉𠵱家因為球會賣盤,畀拖欠薪金,要鬧上法庭。雖然同佢一齊由德國返祖家發展之楊晨都無起色,但深圳健力寶話晒大球會,唔使擔心無糧出;謝暉就黑仔囉!