現年57歲的吳岱融近日憑劇集《巨輪II》鷲哥角色翻生，連接四部電影及多個商演，短短個多月已隱袋100萬。想不到吳岱融狂吸金，連帶他退隱江湖11年的太太鍾淑慧亦受惠，近日獲馬來西亞一美容產品邀做代言人，由於過去11年鍾淑慧主力做家庭主婦，偶爾只會在內地或美加登台商演，幾乎絕迹幕前演出，今次獲邀做美容產品代言人，可算是她出山之作。

另外，日前有讀者在新加坡發現鍾淑慧與吳岱融十指緊扣行街，束馬尾的鍾淑慧穿黑色間條上衣襯黑裙，跟全黑打扮的吳岱融襯到絕。由於吳岱融近日人氣再升，行街時被不少途人認出並舉手機拍照。

日前記者致電鍾淑慧，對於出山做美容產品代言人一事，她特別多謝老公吳岱融說：「多謝吳生帶挈，近排多咗人搵我做嘢，家仲傾緊一個美容產品嘅代言，傾得9988，遲啲應該要去多次馬來西亞，到時會拍啲廣告同相，兼且出席啲宣傳活動。」問到今次酬勞多少，她說：「呢啲唔好講，總之好滿意，我最希望將來可以做瘦身代言人，我自己都想減肥瘦身。」鍾淑慧表示會以最佳狀態拍廣告，近日正爭取時間休息及保養皮膚，務求以靚靚姿態示人。

問到有讀者發現二人在新加坡商場十指緊扣行街，認真甜蜜蜜，記者問是否mark實老公時，鍾淑慧笑說：「冇乜嘢mark唔mark實，我哋啱啱喺馬來西亞返去新加坡，之後又約咗啲電視台嘅製作人傾明年嘅工作，咁今日放假嘛，梗係行吓街、食吓嘢，休息吓，冇乜特別喎。」

選美出身的鍾淑慧，90年代有感在無綫發展平平，於是跟當時還是男友的吳岱融，以情侶檔姿態拍三級片而成為佳話。二人於95年結婚生仔後，有見內地樓價比香港便宜許多，於是在10多年在內地置業，順道在內地發展，直至上周二人被發現到馬來西亞睇3,000呎新樓盤，準備再置業。