經常指控泛民收「黑金」嘅「正義聯盟黨」主席李偲嫣，上月底俾黨副主席蔡克健喺fb開火炮轟，發公開信指控李偲嫣錢銀唔清楚，一邊拖欠黨友血汗錢，一邊同為虎作倀嘅人「食豐富晚飯」，更將苦主同黨友剔出「正義聯盟」、「撐警大聯盟」同「藍絲帶運動」嘅fb群組；仲話李打住「正義」旗號去做「不正義」嘅事，斥李「多行不義必自斃」，真係反晒面！

指大額捐款由李接收

呢場「正義聯盟內訌」唔止有蔡克健反李偲嫣，曾經同李偲嫣一齊「反佔中」嘅80後青年，噚日就以「誠信」為題，喺fb公開一封由蔡克健聯同黨員發表嘅聯署聲明，指過去唔少黨友曾大額捐款畀「正義聯盟」，但「正義聯盟」財政一直只由李偲嫣負責，兩個副主席一直無權過問，大額捐款全部係李偲嫣私下接收，而非直接存入「正義聯盟」銀行戶口，直至最近有捐款人士向兩位副主席查問捐款去向，兩位副主席先知情。
蔡克健同黨友喺聲明要求李偲嫣一星期內交代賬目，「否則難保有大額捐款人士，會以懷疑有人私吞數以十萬元計的捐款而報警求助」喎。
對於蔡克健嘅指控，八方噚日打畀李偲嫣問佢有乜回應，佢就話：「我一陣會寫番上去回應㗎嘞，你唔使擔心，《蘋果日報》我都唔會做訪問啦，我會發晒（回應）畀咁多個（傳媒）喇，唔該！」之後掛斷電話。八方噚日亦搵過蔡克健了解，但佢一直冇回覆。

李八方
mailto:[email protected]