由女主辦嘅《大話西遊III》首映，今晚喺奧海城舉行，仁美清叙主席黎燕珊專登帶埋個女嚟支持，可以教阿女工作以外，都要回饋社會。珊姐個女被問到平日有冇做善事？佢話：「自己成日飛，都冇時間，但成日聽媽咪分享佢做善事嘅嘢，見到佢咁開心，令到自己覺得有時間都要去做。」

今次活動係為咗一個抑鬱病嘅團體籌款，珊姐話：「目標係想籌40萬，o依家已經有30幾萬。」佢被問到有冇試過患上抑鬱症，佢個女代答：「冇」。另外，珊姐就認自己有潔癖，珊姐阿女話有叫過媽咪唔好太緊張，珊姐就話：「其實對仔女係自己嘅天使，加上工作就係最好嘅治療方法，忙啲就唔會諗咁多嘢。」

至於同場、港姐出身嘅朱慧敏，就透露同黎燕珊係朋友，應對方邀請現身：「知道係仁美清叙，但冇所謂，都係慈善，加上自己同無綫都已經約滿，不過如果港姐活動搵我都會出席。」

提到早前爆出選美批踭等是非，朱慧敏話：「大合嘅照時候可能大家叉腰，未必係有心撞到人。（你有冇中過招？）因為我係1號，所以會專登企開啲避免呢啲事，而個cam man會叫我企番埋啲。」

另外，朱慧敏早前被影到同前度男友Eddie一齊，問佢係咪復合？朱慧敏話：「o依家嘅關係仍然都係維持喺公司嘅夥伴同好朋友，因為嗰排中秋，自己舖頭有賣月餅，有啲好熟嘅朋友或者訂單，都會一齊去送貨。」咁中秋節有冇人月兩團圓、同Eddie一齊過？朱慧敏話：「中秋去咗上海，做舞台劇《我和春天有個約會》，所以冇同佢一齊過，淨係同劇團嘅人一齊過。」佢仲話套劇喺內地嘅巡迴成績好好，1月會再去演多20場。

咁到底佢同Eddie成日見，係咪真係喺番埋一齊？朱慧敏話：「真係冇諗，由朝到晚都係忙緊自己事業嘅嘢，希望自己嘅事業都會做得更好，嚟緊嘅工作都已經排到1月尾。」