貴為香港總商會百年來首位女一姐，又係英國牛津大學一級榮譽畢業，大家理所當然認定身為總商會CEO嘅袁莎妮（Shirley）肯定乜都攞第一，但原來佢細個一直「阿二命」，冇乜冠軍相。
Shirley憶述小時係乖乖女，「老師話一我唔夠膽話二」，中學就讀嘉諾撒聖心書院嘅佢動靜皆宜；既愛跳中國舞、亦鍾意跑步，同時參加朗誦比賽，但幾乎每次比賽都同冠軍寶座擦身而過，好似參加400米短跑時就都係攞第二咋。

文學攞D　喊到變豬頭

佢自言讀書一向唔錯，雖然會考成績係1A2B4C1D，但同當時期望有落差，因為有下過苦功嘅中國文學攞D，首嘗人生挫折嘅Shirley「喊到豬頭咁」；唔忿氣又有啲逞強，Shirley更加勤力咪書，最終高考獲3A1B佳績，攞埋獎學金去牛津讀大學兼考埋全級第一。佢話呢個小故事可以反映，只要有目標，冇嘢係做唔到。
Shirley嘅高中校服look好pure好true，外形咁標致，求學時應有男仔門口等放學？佢哈哈大笑話冇，但中七任Head Girl時就有粉絲：「啲初中同學好似當你係歌星咁，會同你影相同會接送。」