經民聯梁君彥出選新一屆立法會主席，因為他持有英國國籍，令整個主席選舉變成一場政治風波。有政界中人直言，立法會議員關注梁參選時是否已沒有英國國籍及居留權，但更多人關心梁如何貪戀英國國籍，遲遲不肯放棄，諷刺的是西環卻選擇支持戀英的梁，難免會令一些愛國愛港建制派不是味道。
有政界中人笑言，指梁君彥貪戀英國國籍，絕非無的放矢，他翻查資料，早在8月已有傳媒引述建制派消息，會推梁君彥做立會主席，雖然梁當時稱仍要考慮，但作為愛國愛港人士，「既然都考慮選主席，為乜唔喺8月就搞放棄英籍？」

他又說有消息指梁君彥是9月22日才申請放棄英國國籍，而梁自己承認9月中才提出申請，而英國內政部發給梁確認放棄英國國籍函件，則是9月30日發出，若再對照傳媒報道，梁君彥放棄英國國籍的時間，應該是西環出手、成功力阻田北辰及謝偉俊參選主席，梁才着手搞放棄英籍程序，該政界中人笑言，梁做法等同說明，除非十拿九穩一定可以做立會主席，才肯放棄英籍，「如果只係要佢選主席、唔保證一定選到，而要佢放棄英國國籍的話，梁君彥情願先揀保住個英籍先！咁唔係戀英係乜？」
當然更大的問題是，為何西環千選萬選，「有40個建制派議員畀佢選、最少有兩個話明有興趣選，但西環係都唔揀，係要揀個有英籍嘅，你叫班愛國愛港、又冇外國籍嘅建制議員情何以堪呢？」更有另一民主派笑言，今次西環不避嫌直接插手立會選主席安排，結果卻弄出個大頭佛，「呢一鑊唔知西環又使唔使孭鑊？」
周一、三、五刊出
季陶