成日都話曼城領隊哥迪奧拿係「改造大師」，由馬斯真蘭奴、拿姆到過去一季喺曼城試過用捷西斯拿華斯、費蘭甸奴打右閘或者右翼衛，其實英格蘭國家隊可能都有呢鋪癮，舊年搵射手哈利卡尼開角球可謂震驚全球。「三獅兵團」上場苦戰下2:2逼和蘇格蘭，嚟緊周二就會作客法國踢友賽，領隊修夫基面對中場兵荒，上場起用艾歷迪亞同積基李華摩亞扼守中場中路，近日更喺操練起用上場冇踢嘅曼城中堅史東斯踢中場，仲話對呢個idea充滿信心！

雖然史東斯預料周二會踢番老本行中堅位置，但修夫基喺周一記招時表示：「史東斯擁有一切出任holding midfield嘅技能同實力，佢的確未試過，我哋確實要取捨，但我係咪相信佢能夠勝任？毫無疑問。而且我亦渴求能夠冷靜引球推進嘅守將，所以我認為佢做到後衛或者中場一職。」