滙豐宣佈推出黑池交易，擺明把大戶及機構投資者才有水平駕馭的交易方式，夾硬加諸散戶。銀行落錯盤屢見不鮮，在高頻交易之下，客戶隨時死無對症。
大家還記得2007年阿里巴巴（1688）掛牌首日，兩間本地最大型的零售銀行，因為散戶盤太多而齊齊慢機，還有，間中時有所聞的慢機甚至down機事件，而每每又總要在市旺或大上大落之日出現。
證監會權力真空之時，滙豐又咁啱推出黑池交易，而港交所（388）以為交易徵費不受影響，當然滿心歡喜，但係喜羊羊焉知背後有隻灰太狼，對佢流晒口水。

滙豐倘過關　中銀渣打勢跟

螳螂捕蟬、黃雀在後，當一眾經紀炮轟延長交易時段，並奮力圍攻李小加之際，冷不防大型零售銀行、即小經紀的真正敵人，已在背後暗渡陳倉，若滙豐今次成功打通任督二脈，可以預期，中銀（2388）與渣打勢必跟隨大玩黑池，到時大家已不需要再爭議港交所露不露經紀牌。
零售銀行將來若聯手要求港交所減收費，也是非常合乎邏輯的預期，不知證監會高層又想不想到呢？
還有，不需要等大鱷出口，佔大市成交兩成的同胞，將來隨時可以銀彈攻勢，舞動港股，製造市場恐慌性買貨或出貨。
大行可能認為個牌俾全人類睇晒，有如被剝光豬，但同樣具備大行背景的輪商，就唔想自己個牌隱形，皆因炒輪嗰班人見唔到牌，就好容易以為輪商唔開價。
證監會如果真的學外國經驗，向滙豐黑池開綠燈，到頭來市場隨時會弄得滿城風雨，香港這個國際金融中心地位將危危乎。
胡孟青
獨立股評人