【停業42日】跳舞學校被投訴濫收費用 蘇志威怒爆蝕咗400萬
蘋果日報 2020/05/10 17:47
蘇志威idance限聚令
互聯網圖片
草蜢成員蘇志威（阿細）在港開設跳舞學校 iDance，繼早前有讀者投訴尖沙嘴分校停業兼炒員工沒賠償，蘇志威解釋炒人是正常兼賠足後，今日《蘋果》再收到讀者投訴 iDance 疑濫收費，稱為配合政府限聚令措施，將會轉為7人的小班課堂，會員選擇參與7人的小班課堂，將會扣除2個Credits；並聲稱有導師更向學員透露，公司唔出糧，批評蘇志威和韓馬利是無良商人。
而在 iDance 的FB 官網，昨晚貼出「課堂最新安排」告示，指課堂將轉為7人的小班，如會員選擇小班上堂將扣除2個Credits，其間已購課程將延期14天，之前已預約課堂的會員，將辦理取消課堂預約並退還Credit手續；不少網民留言鬧爆：「冇道理扣會員二堂不公平」、「強烈譴責濫收費用」、「將個承擔轉嫁於會員，真的過分」、「點解你哋公司政策朝令夕改」。
《蘋果》向蘇志威了解，他在電話說：「因為限聚令，之前指引唔清楚，我學校成萬呎，每個課室其實可以有4個小組，每組8個人，跟番政府指引安全隔離空間，所以開番大班畀大家喺電腦上報名，但開咗第一日後，收到通知話唔可以咁做，因為呢個觸犯刑事，CEO通知番所有學員，你哋喺電腦上報名要取消，全部錢退回。根據政府指引，每個課堂可以有7個會員跳舞，決定開個7人小班，但3000呎課堂得7個人，其實蝕錢蝕得好緊要，CEO就話，如果用兩堂收費用3000呎房，我哋可以接受，所以我畀學員有呢個選擇，如果你真係好想跳嘅話，如果你唔想跳，你冇損失，我將你會籍延續兩星期，你係冇任何損失。」
對於網民的投訴，蘇志威指出：「佢哋可以發洩，不排除有啲人唔係學員，不排除有其他對手鍾意寫乜就寫乜，有啲可能係學員嬲，政府政制令我朝令夕改，所以學員將憤怒轉嫁iDANCE身上，其實我係根據政府指引做決定，我都係夾喺中間，原來一個課堂只可以有7個人。學員請記住，限聚令係非常時期，你哋當iDANCE冇開，唔好參與，14日後正常先嚟，而家開小班係畀限聚令下都好想跳舞嘅人，大家共同度過，我寧願蝕都做。」
蘇志威指因為限聚令，跳舞學校停業42日，損失慘重，「我好想講，如果每日每堂得7個人，我公司係蝕得好緊要，我從來唔講數字，今日破例講數字，蝕咗起碼超過400萬，因為呢42日冇開，租金同員工係300幾萬，但政府只係補貼咗50萬，呢個其實係好唔公平補償，我公司損失好慘重，一間美容院、小型舞蹈學校，五個員工每個有8萬，而家我公司係80人，賠得50萬，呢個好慘！佢話同業界傾過，究竟佢同業界邊啲有名望嘅人去傾？我好懷疑，如果我哋唔係龍頭，唔係同我傾，你同邊個傾，食環究竟諮詢過邊個？」
至於被批評是無良商人，他無奈說：「每個人睇嘅嘢唔同，我哋做咁耐生意，我冇做違反良心嘅嘢，佢哋點解咁寫，幾個原因：誤會、抹黑、憤怒，其實你可以選擇唔嚟。我可以做啲乜？有人話我冇出糧，黑心老闆，想問我冇出畀邊個？我從來冇做過呢樣嘢，如果有，點解唔去勞工處告我？」