【電池保養】雙USB插頭叉座 內置時間掣唔使叉通宵
蘋果日報 2018/12/06 00:03
肥通快叉電池MICHI2 PORTS TIMER CHARGER時間掣叉過夜慢叉
MICHI 2 PORTS TIMER CHARGER（$99），機頂Power按一下就叉電一個鐘，有6顆叉電燈，最高對應叉電6小時。
「手機叉電」係大家每日面對問題，有人喜歡快叉，因為快手搞掂！亦有人喜歡正常叉機，感覺對電池維護好一點。如果你同肥通都係「慢叉」一族，最近有一款好產品可一諗。
這款產品是－－MICHI 2 PORTS TIMER CHARGER（$99），初推出時要$168！還要是5V/2.4A的雙USB插頭設計，感覺真係有啲貴；不過最近玩落價，同錦興老闆阿Fan傾偈，先明白佢個設計概念！
阿Fan話：「有人話快叉幫手機充電係快啲，不過在使用上，感覺電池消耗亦會快一點，這方面暫時未有實質數據支持，不過好多愛機一族，都喜歡用返5V/2.4A的傳統式叉機。不過這類USB充電器亦有一個問題，如果你喺臨瞓前叉手機，由於『慢叉』時間會長一點，好容易會變成『叉過夜』，一樣對手機電池有損害。」
這款新設計的二頭5V/2.4A USB叉電器，就係專為針對這方面問題設計，機頂有6粒LED，每按一下Power掣就會點亮一格，並代表叉電一個鐘（最高對應6小時叉電），時間到了就會自動斷電，以確保唔會有過充情況，並且可為你節省電力。阿Fan續稱：「其實現在新款的手機，在你插上叉電線時，已經可以預計出充電時間，只要你跟着這個時間來叉電，一樣可以做到準確的叉電效果。」
查詢：錦興瓷器行（旺角廣東道1003號地下）
記者、攝影：朱崇德
機身有兩個5V/2.4A的USB叉電位。
13A的插蘇腳，使用可收納式設計，方便你帶出街用。