《X分鐘看完電影》系列創作者網絡人谷阿莫，一向喺網絡上以唔同電影、劇集嘅片段，再加上自己嘅評論令到佢爆紅，甚至還被「韓國WebTVAsia頒獎典禮」評選為年度最佳頻道。不過人紅就自然是非多，因為谷阿莫嘅片中會用到唔同劇集、電影嘅畫面，今日台灣嘅KKTV和電影公司「又水整合」證實對谷阿莫提告「侵權」。

KKTV係一個網上睇劇嘅平台，舊年就買咗韓劇《W-兩個世界》嘅新媒體播映權，最近KKTV積極掃蕩網路盜版影像，咁谷阿莫就喺未有事前通知KKTV嘅情況下，用咗《W-兩個世界》嘅片段製作咗《11分鐘看完960分鐘的韓劇》，所以KKTV才會向台灣嘅檢調單位(檢察調查單位)提出異議，處置方式也全權交畀檢調單位處理。

電影公司「又水整合」指，喺舊年開始準備告谷阿莫，指谷阿莫用咗至少4套呢間公司嘅電影作品，包含《哆啦A夢》、《腦漿炸裂少女》、《近距離戀愛》等等，「又水整合」指谷阿莫講到電影無聊，影響觀眾買票進場嘅意願。

而谷阿莫今日都喺自己嘅facebook同YouTube，拍咗條片講番佢自己被告嘅事，向觀眾解釋「著作權合理使用原則在網路上的適用」，最後佢都話無論佢觀點角度係點都好，最終都係要等法官嘅判決，仲話：「不會輕言退出！」