32歲戴夢夢喺上個禮拜被爆同51歲太極Ricky兩年情玩完，跟住仲被影到同一個年約40歲嘅中年男去咗澳門嘅賭場玩兩手，全程又攬腰又黐得好埋，好似熱戀中嘅情侶。事後夢夢接受《蘋果》嘅訪問，佢承認同Ricky已經和平分手，至於同中佬遊澳門，佢只係話：「其實大家仲了解中，佢係圈外人，唔想講太多！」(新聞連結： http://bit.ly/2s13wkK )

今日有周刊報道，夢夢嘅新歡原來係任職五星級酒店嘅首席品酒師Sam Chong，喺行業係一個大紅人，曾經獲得唔少品酒比賽嘅獎項，得到公司嘅器重。報道話本身愛酒嘅夢夢，同阿Sam可謂志趣相投，近排夢夢仲去學品酒，大家越走越埋，夢夢亦有將新歡介紹俾林建名認識，而且佢亦會帶隊去男友任職嘅餐廳食飯，似乎已經融入咗佢哋朋友圈。其後周刊亦曾經聯絡過Sam本人，不過對方以工作理由，婉拒回答。就撻着品酒師新歡一事，今日《蘋果》致電戴夢夢，佢以短訊回覆：「沒有回應，多謝大家關心！」