金魚缸靜過鬼，最適宜諸事八卦，近日財經圈就八緊邊位財經演員偷食。消息一出，一位離婚再娶的中年靚仔財演即刻俾人點名，講到真嘅一樣。但聽聞真正偷食嘅呢位財演絕不靚仔！傳聞中「偷食財演」年過40，曾經低位買入一個九龍站凱旋門單位，平時多數喺圓方出沒。咁蹺有位中年「靚仔財演」近年轉過兩次會，加人工令佢發過豬頭，令人感覺佢實買起得凱旋門，加上佢離婚再娶，被標籤「用情不專」，再去偷食都唔出奇。華華唔敢百分百肯定「靚仔財演」有冇再偷食，但佢家陣呢位太太就確實得佢好實（唔知係咪擔心佢又離婚再娶），兩公婆星期一至五放工一定等埋食飯，一齊返歸，星期六、日放假例必行孖咇。偶爾「靚仔財演」出差，太太都一定跟埋去，仲之好似人肉跟蹤器咁，呢位財演想偷食應該都要諗爆頭。