NBA球隊費城76人上季雖然以28勝54負敬陪東岸尾二，但表現予人驚喜，其中D沙歷（Dario Saric）同艾比迪（Joel Embiid）齊齊候選今季最佳新秀，仲有未開季就收「咧」嘅2016年新秀狀元賓西蒙斯（Ben Simmons）蓄勢待發。佢哋早前喺「抽波仔」攞到探花籤，下周五舉行嘅選秀會已經大把人揀，勢估唔到諗住再貪心啲，有意染指塞爾特人嘅狀元籤，目標直指過去一季大學賽場均貢獻23.2分、5.9助攻同5.7籃板嘅華盛頓大學19歲控衛富斯（Markelle Fultz）！

美國傳媒周五廣泛報道，指76人同塞爾特人正進行商討，前者將會以今屆探花籤加上未來潛在狀元籤，換取「綠軍」今年選秀嘅狀元籤；消息更指早前先後到塞爾特人同湖人試訓、但口風明顯傾向「綠軍」嘅富斯，周六隨時U-Turn前往費城會面，而76人亦非常關注富斯嘅體測報告，以免延續新秀傷多過打嘅黑氣！另有消息指兩軍同樣對肯薩斯大學前鋒祖殊積遜（Josh Jackson）表示興趣，所以今屆狀元誰屬仍然有待揭盅，但唔少網民已經事先FF艾比迪、賓西蒙斯同富斯聯手打江山，話呢支76人大把前途！