今年剩低得番散收收5個交易日，平安夜同除夕各半日，連新地案判埋案，收爐味甚濃，至少高明已經自我感覺收爐。

可惜個人上爐已收，實際上股市價照開，冇貨固然可以安心去旅行，有貨的話，「心底裡」係無收爐呢個概念，一個唔好彩好似噚日比亞迪（1211）咁，即使畀你去到玻利維亞天空之鏡鹽湖，你心情都唔慌海闊天空，反而會拎個電話出嚟，甘冒每kb過百蚊風險，都要篤一篤1211個報價，然後成日旅程心情就此泡湯。

好彩嘅係，過去5年，最後5個交易日，都係升多跌少，平均升250點，就算係跌嘅一年，即係2012年，都只不過係跌2.86點，就以舊年為例，都升咗494點。

另外，假期前半日成交，波幅一般較細，少過100點，對於仲返緊工睇市嘅人嚟講好唔公平，連波幅都冇得玩，但去咗旅行就安心啲。

至於萬一買咗比亞迪（1211）之類嘅暴跌股，點算好？就係好似阿媽教仔咁：「唔準喊！即刻笑番」，然後完成埋個旅程佢。

高明

神奇‧頂級‧超卓，盡在偶像派財演高明Facebook專頁：
https://www.facebook.com/BigRiceTea