對上個禮拜，葉劉淑儀同朋友李兆富個show，真係好睇。古惑仔都係挑差佬機，淨係發夢有人連差佬嘅老細，即保安局局長都唔怕，嗰吓勁！講型，陳浩南都要輸俾李兆富！

不過葉劉本人，因不斷提我有份做董事嘅「獅子山學會」。所以上個禮拜我地董事局都有傾呢單嘢。不過因李兆富2011年老早離開咗個會，我哋又冇同佢傾計，唔知佢生意上啲嘢，所以董事局都唔使點傾。

因香港得一個永遠唔拗底，因永遠唔攞政府錢嘅機構，就係得我哋獅子山學會。我哋由始至終，覺得政府run嘢會好嘥。曾佔香港零售空間百分之十嘅公屋街市、商場，如果仲喺政府手，run到pat屎咁，對得住公屋居民咩？

每次係啲論壇講領展（823），我聽嗰啲講到私有化前世界幾美好時。我就諗，佢哋呢啲由頭到腳都中產味濃嘅人，當年有冇落過嗰啲場？多唔好講，淨係去公屋商場廁所，屙一篤尿？嗰種溶爛、污蹧。原來贖「做中產」罪，要建築喺公屋居民尿壓味、沖不走的千年屎之上！

不過睇葉劉個黨，個個智商企埋成支銀河艦隊咁，下次工聯會唔過票都贏硬！Sure Win！

最後，尋日睇本報講香港啲廣告公司同FB，我就真係覺得今次我哋嘥咗。一場風波，完全唔關獅子山學會事，不過就係咁loop住我哋個名。哎，如果有陶傑、田北俊、100毛抽水嘅能力，推政策俾市民都易好多啦！真係好可惜。

為釋放更多被政府控制嘅嘢，因私有化用得更好，我哋呢個抽水力弱嘅問題，就真係要檢討。

孫柏文