安察洛堤今季教拜仁慕尼黑真係順風順水，繼喺德超盃挫多蒙特捧盃之後，喺上周五德甲開鑼戰，就算前鋒羅拔利雲度夫斯基右腳波砵穿窿都連中三元，主場炒雲達不來梅6:0。肥安出名識做人，賽後就大讚前教練哥迪奧拿：「我一早講過，隊波喺哥迪奧拿時代已經好強，特別係控球，所以我唔會對球隊打法作好大改變，只希望球員繼續踢出壓迫性足球。」