理文集團（746）昨日升13%，成交350萬股，係今年第2大成交。呢間公司，並唔係理文造紙（2314）母公司，要搞清關係，就要數到97年上市，原本嘅理文集團，當年上市號碼係554，02年將最賺錢嘅手袋業務，以介紹形式分拆上市，叫理文手袋。之後主席李運強將理文集團個殼賣出，再買回錄音帶及造紙業務，並夥同由加拿大讀完書回港嘅大仔合作搞大造紙生意，03年獨立上市。
由於554隻殼改名做漢思能源，理文手袋又改番名做理文集團。呢間公司淨係做手袋生意已經可以做到年淨現金流入兼純利逾億元，6月底止零負債兼淨持現金2.27億元，扣除現金後核心PE只不過5倍左右。
淨做手袋收入好穩定，但無乜突破，年前公司開始搞化工業務，早前以6億日圓，向一間日資公司購入江蘇沿江工業園一幅面積500畝以上的土地，搞甲烷氯化物產品嘅生產線。呢種甲烷氯化物，即係空調雪種。