摩納哥10月尾搵嚟以前未做過主教練嘅亨利救亡，但亨利第一次坐正似乎就冇辦法起死回生，禮拜日法甲領軍主場0:4慘敗畀巴黎聖日耳門（PSG），上任後各賽事六場得兩和四負，而摩納哥亦都繼續沉淪尾二。

呢場以往嘅爭標大戰變成大屠殺，PSG憑卡雲尼連中三元，加上尼馬64分鐘射入12碼，輕鬆大炒四球，開季13場聯賽全勝，繼續刷新歐洲五大聯賽嘅最佳開局紀錄。亨利教摩納哥以來各賽事六場不勝，近兩場輸畀布魯日同PSG加埋足足吞咗八隻蛋，近三場波仲一球都入唔到。

𠵱家摩納哥得七分排尾二，僅靠得失球差壓住甘岡唔使包艇，而亨利教波以嚟用過三中堅或者雙箭頭陣式，今場就回歸4-2-3-1，不過都冇起色，呢個41歲法國名宿就話：「我哋兩班波嘅質素完全唔同，PSG今場贏得好輕鬆，但唔代表我哋散漫，球員都能夠保持集中，而且我哋喺嚴重傷兵問題下，都能夠創造入球機會已經唔錯，我哋要保持正面。」不過，摩納哥今場有查迪尼同麥保拿傷出，一隊傷兵名單去到13人咁多。