靠賣電器一度成為內地首富嘅國美主席黃光裕，雖然呢個寶座已經喺舊年俾玖龍紙業董事長張茵搶咗，但佢哋家族冇咁易認輸，黃光裕大佬黃俊欽，將手上嘅新恒基集團，借ST金泰個殼上市，令黃氏兩兄弟嘅資產夾埋超過400億人仔，成為內地最有錢嘅家族。
據《每日經濟新聞》講，由新恒基集團控制嘅ST金泰，宣佈配售80億股，每股作價3.18元人民幣（下同），其中新恒基集團將地產項目注入，收咗70億股，新恒基董事長黃俊欽，淨計揸住嘅股份，身家已經超過220億，加埋黃光裕嘅200億身家，兩兄弟嘅資產逾400億，成為內地最有錢家族。「兄弟同心，其利斷金」呢句話，對佢兩兄弟嚟講，真係一啲都冇錯。
黃光裕嘅國美上市後，佢本人十分高調，又成日接受訪問，所以係人都識，佢大佬就低調得多，不過原來都好猛料㗎。
話說黃俊欽87年同細佬一齊到北京闖，喺做生意之餘，又自學無線電同電腦，後來喺電腦未普及嘅時候，就已經用電腦嚟收錢，夠晒前衞。

93年，佢同細佬分道揚鑣後，黃俊欽轉搞房地產，創立咗新恒基集團，生意越做越大，02年又收購咗上市公司金泰，身家唔嘢少，04年上埋胡潤富豪榜，以27億資產排第27位。05年升到13位，身家急漲至55億，06年反而以65億排第20名，黃光裕就曾爆料，話大佬有錢過佢，𠵱家果然證明冇錯。
華華補充一句，ST（SpecialTreatment）股就係啲虧損兩年嘅股份。
[email protected]