今日劉德華與朱麗倩宣佈人工受孕成功，年屆50歲嘅朱麗倩懷有「小華Dee」，另一邊廂，台灣藝人藍正龍亦傳出喜訊，指其太太周幼婷繼去年為佢生咗一女之後，目前已經再度懷孕兩個多月。

今年37歲嘅藍正龍，前年5月同大佢一年嘅周幼婷結婚，婚後火速造人成功，去年誕下長女小籃球，目前小籃球仲未夠一歲，但今日台灣消息指，佢哋又再搞出「人命」，話周幼婷O依家已經懷孕兩個多月，但礙於要到4月中才滿3個月，所以佢哋嘅經理人公司亦唔願作出回應。

其實藍正龍去年太太懷孕時，就帶旺佢奪得金鐘視帝，當時有記者就問佢幾時會再生第二胎，當時佢都好順口咁用英文答：「ASAP（Assoonaspossible盡快）」，至於佢老婆周幼婷產後亮相時，都講過O依家嘅生活全被寶寶佔據，滿口媽媽經嘅佢都漏口風：「希望40歲之前再生一個！」冇諗過佢兩公婆真係咁有口齒，講得出做得到，今年再當爸媽。

有指周幼婷為咗安心做媽媽，由懷有長女至今已推掉7部戲，但間中也拍廣告以及做公益代言。而藍正龍為了盡爸爸責任，就一口氣接咗好多廣告之餘，之前還擔任導演王明台電影的副導助理，不過今年5月佢就會接拍1部電影。