明晚（16日）第四場四班1650米，拆兩組後，此組有如遺材賽，全場季內無一識贏，有近績馬亦不多；「一舖成名」季初三班捱打，卻從連場實戰跑起狀態，自大前仗起已覺到位，可是條件還未足夠。

羅富全早在減分期內，不斷為「一舖成名」試新嘢，為落四班鋪定路，泥地、谷草都跑過，大前仗三班谷草1200米用黃皓楠排外檔，起步慢半拍，沿途跟唔上大隊，直路越打越有輸近，證明兩樣嘢，狀態開始好，以及啱跑谷草。

重返四班後，「一舖成名」連跑兩場田草1400，前仗遇超慢步速，根本冇得追，用力唔多衝近；上場同樣因落腳轉慢，排好檔，想跟前都跟唔到，加上因直路塞車，又係得個「近」字！

經此兩場後，羅富全一定睇到「一舖成名」落腳轉慢，不能再跑1400，結果揀了今場轉戰谷草一哩，着數到極；路程、場地、狀態三瓣條件都無問題，只等排檔、對手等因素配合。

今次跑弱組，排1檔，換田泰安治到其懶性，估計唔會再蝕頭段，有機會咬番前，甚至跟在「萬事醒」與「萬馬歡騰」之後靚位，不論得與唔得，排1檔起步，一定幫到手。

另外第七場三班1200米，鍾意雙「騰」，「騰龍駒」上仗谷草同程，雖被「小鳥敖翔」拋離，卻已是兩個月前的事，如今已轉交苗禮德接手，經過重新打造，鎖定此場復出，排埋內檔，條件確幾好！

不過「騰龍超影」蘇保羅無疑勢弱，但只要旗下馬有機會，大抵不必懷疑戰意。復課後「騰龍超影」照例操練唔辣，有朝碰巧睇到牠在內圈踱步，弓起馬頸，感覺有精神、有勢，與季初比確唔同！

今仗除抽1檔外，最重要有「小鳥敖翔」、「好得威」與「和諧小子」在陣，前兩駒抽外檔，搶放決心會大，令「騰龍超影」會好好跑，再加上回配最夾的郭能，賠率更抵博！