黎明（Leon）嘅契媽黃小清喺上年平安夜因肺癌病逝，終年55歲，噚日喺香港殯儀館舉行大殮儀式，小清嘅遺體就喺歌連臣角火葬場火化。馮仁昭收到風，今次小清嘅喪禮都係佢個仔同Leon籌辦，不過噚日唔見Leon出現，唔知佢傷心完未呢？
Leon自細父母離異，佢跟住老竇長大缺乏母愛，十幾年前認識小清，小清當正Leon係親生仔，照顧埋佢起居飲食。近年小清患癌，做契仔嘅好擔心，當日小清喺電話度講自己病情，Leon傷心痛哭，後來因為醫藥費太貴，Leon仲畀咗200萬小清醫病，陳冠希老竇陳澤民同小清胞妹玲姐都有一人幫一啲。

陳見飛狂哭

噚日朝早11點半左右，陳澤民同佢個女陳見飛、Leon經理人陳善之等都有去鞠躬。現場見小清胞妹玲姐同陳見飛喊到雙眼通紅，小清親生仔就比較平靜。之後靈車喺12點到達火葬場，經過15分鐘儀式，小清個仔手執一炷清香，小清老公就攞住老婆張遺照同一眾親友離開。
馮仁昭同陳善之通過電話，問點解Leon冇到，係怕引起混亂定係怕觸景傷情，陳善之話：「Leon唔係話怕引起混亂，佢只係想契媽安靜咁去往生，所以佢用佢自己嘅方法。」至於有報道話小清喪禮費用全數由Leon負責，陳善之就話唔方便講喎。